प्रशान्त तामाङको जोडी बाँधियो

दार्जीलिङ निवासी नेपाली मूलका गायक तथा इन्डियन आइडल प्रशान्त तामाङको विवाह सम्पन्न भएको छ । यो वर्षको सफल चलचित्र ' गोर्खापल्टन'का नायक तामाङको नागाल्यान्ड, डिमापुर निवासी गीता थापा मगरसँग यही फागुन ४ गते धूमधामले लगनगाँठो कसिएको छ ।  तामाङको गीतासँग केही वर्षअघिदेखि नै प्रेमसम्बन्ध थियो । वैवाहिक कार्यक्रममा सहभागी हुन उनले अभिनय गरेका दुई चलचित्र 'गोर्खा  पल्टन' तथा 'अँगालो यो मायाको' का निर्माताहरू क्रमशः जितु वंशल तथा किशोर दुङ्माली नागाल्यान्ड पुगेका थिए । तामाङले केही  समयअघि नै नेपालमा रहेका शुभेच्छुकहरूका लागि प्रीतिभोज दिने कुरा बताएका थिए ।