सरस्वती कार्की
कोपनहेगन (डेनमार्क), फाल्गुन ४ - बिहानको ४ बज्दा दीक्षा शर्मालाई उठाउन मोबाइलको घन्टी बज्छ । आँखा मिच्दै खानेकुरा झोलामा कुम्ल्याएर उनी काममा निस्कन्छिन् । ५ बजे सुरु गरेको काम दीक्षाले ९ बजे सक्छिन् । कामबाटै अर्को काममा हुइँकिन उनी झोलामा बोकेको खानेकुराले पेट भर्छिन् । ११ बजे काम सुरु गरेर ३ बजे सक्छिन् । फेरि अर्को काममा पुग्छिन् । एकछिन आराम गरेर ५ बजे सुरु गर्ने काम राति ११ बजे फत्ते गर्छिन् ।
'डेढ वर्षदेखि मेरो दैनिकी यसैगरी बितेको छ,' राति चारदेखि पाँच
घन्टा सुत्ने गरेको बताउँदै उनी भन्छिन्, 'श्रीमान्लाई पढाउन यो हैरानी बेहोर्नुपरेको हो ।' लगातार कडा मेहनत गर्ने उनी महिनामा ३ लाख ७० हजार रुपैयाँभन्दा बढी कमाउँछिन् । अत्यन्तै महँगो कलेज शुल्क तिरेर श्रीमान्लाई पढाउन अधिकांश नेपाली महिला दिनरात नभनी काम गर्न बाध्य छन् । डेनमार्कमा भएका नेपालीमध्ये ९० प्रतिशत विद्यार्थी छन् । अधिकांश विद्यार्थी पुरुष छन् भने तिनका श्रीमती डिपेन्डेन्टमा आएका छन् ।
नेपालबाट ल्याएर कलेज शुल्क तिर्न नसक्नु, विद्यार्थी श्रीमान्लाई महिनामा ६० घन्टाभन्दा बढी काम गर्ने अनुमति नहुनु, डिपेन्डेन्टले जति पनि काम गर्न पाउनुलगायत कारण महिलाले कडा शारीरिक परिश्रम गर्नुपरेको हो ।
रञ्जना श्रेष्ठको अवस्था पनि उस्तै छ । हरेक बिहान १ बजे उठेर काममा जाने उनी विभिन्न ठाउँमा काम सकेर साँझ ६ बजे कोठा आइपुग्छिन् । 'भो कुरा नगरौं कस्तो होला राति १ बजे उठेर काममा जाँदा,' प्रतिप्रश्न गर्दै उनी पीडा पोख्छिन् । दैनिक राति चारदेखि पाँच घन्टा सुत्ने बानी परेकी उनी भन्छिन्, 'दिउँसो काममा १५/२० मिनेट उङ्न पाएँ भने दिउँसोको पनि निद्रा पुग्छ ।'
दुई वर्षदेखि झोलामा बोकेको खानेकुरा खाएर काम गर्नुपरेको बताउने उनी श्रीमान्को कलेज शुल्क संकलन गर्नुपरेका कारण कठिन संघर्ष गर्नुपरेको सुनाउँछिन् । विद्यार्थीले तहअनुसार प्रतिवर्ष ९ देखि १४ लाख रुपैयाँसम्म कलेज शुल्क बुझाउनुपर्छ । कलेज जाँदा लाग्ने यातायात खर्च र नास्ता गरी दैनिक २ देखि ३ हजार रुपैयाँ खर्च हुन्छ । महँगो घरभाडा, लाउने-खाने, यातायात, सञ्चार खर्च छुट्टै लाग्छ ।
'मैले लगातार ३९ घन्टासम्म काम गरेकी छु,' जुनु केसीले थपिन्, 'कलेजलाई धेरै पैसा तिर्न नपर्ने भए कुनै पनि नेपाली महिलाले यति दुःख गर्न पर्दैनथ्यो ।' कामका लागि ६ बजे घरबाट निस्कने जुनु राति १२ बजे कोठा पुग्छिन् ।
समय अभावका कारण कतिपय महिला काममै नुहाउने उल्लेख गर्दै उनले मन्जन ब्रस झोलामै हुने बताइन् । हत्तपत्त काम नपाइने भएकाले पाएको काम जति कठिन भए पनि गर्न बाध्य हुनुपर्ने उनले बताइन् । 'बढी कामले गर्दा कहिलेकाहीँ ज्वरो आएको पनि थाहा पाउँदिनँ,' उनी पीडा पोख्छिन् ।
श्रीमान्को बिदा भएको दिन श्रीमान् जान पाउने काममा श्रीमतीलाई सघाउन जान्छन् । अफिस तथा कम्पनीको प्रकृतिअनुसार नेपाली महिलाले प्रतिघन्टा २५ देखि १ सय ६० डेनिस क्रोनर कमाउँछन् । उनीहरूले महिनामा १ लाखदेखि ४ लाख रुपैयाँसम्म कमाउँछन् 
No comments:
Post a Comment