काठमाडौं/ नेपाल टेलिकमले सेयरधनीलाई प्रतिसेयर ४० रुपैयाँका दरले नगद लाभांश दिने भएको छ । टेलिकमको आइतबार बसेको सञ्चालक समितिको बैठकले गत आर्थिक वर्ष -०६६/६७) को नाफाबाट सेयरधनीलाई प्रतिसेयर ४० रुपैयाँ नगद लाभांश वितरण गर्ने निर्णय
गरेको हो । टेलिकमले गत वर्ष १० अर्बभन्दा बढी खुद नाफा कमाएको थियो ।'प्रतिसेयर ४० रुपैयाँ नगद लाभांश दिने प्रस्ताव पारित भएको छ,' सञ्चालक समितिका एक सदस्यले भने । सञ्चालक समितिबाट पारित प्रस्ताव अर्थ मन्त्रालयले स्वीकृति दिएपछि अनुमोदनका लागि वाषिर्क साधारणसभामा पेस गरिनेछ ।
कम्पनीले गत वर्ष प्रतिसेयर ३५ रुपैयाँ नगद लाभांश वितरण गरेको थियो । स्रोतका अनुसार टेलिकमले सेयरधनीलाई प्रतिसेयर ३५ रुपैयाँ मात्रै नगद लाभांश दिन प्रस्ताव गरेको थियो । 'कम्पनीको वित्तीय अवस्था तथा दीर्घकालीन हितलाई ध्यान दिएर ३५ रुपैयाँ मात्रै नगद लाभांश प्रस्ताव गरेका थियौँ, तर अर्थ मन्त्रालयले ४० रुपैयाँभन्दा कम गर्न नहुने अडान राख्यो,' स्ा्रोतले भन्यो ।
टेलिकमले सर्वसाधारणका लागि सेयर निष्कासन गर्दा प्रतिसेयर मूल्य न्यूनतम ६ सय रुपैयाँ तोकेको थियो । बढाबढका आधारमा निष्कासन गरिएको सेयरका लागि सर्वसाधारणले एक कित्ताका लागि २५ सय रुपैयाँसम्म तिरेका थिए । सरकारले टेलिकमको १ करोड ५० लाख कित्ता सेयर मूल्य बढाबढका आधारमा निष्कासन गरेको थियो । टेलिकमको हाल प्रतिसेयर मूल्य ४ सय ४६ रुपैयाँ छ । टेलिकममा अहिले सरकारको ९२ प्रतिशत र बाँकी ८ प्रतिशत कर्मचारी र सर्वसाधारणको सेयर छ ।
No comments:
Post a Comment