काठमाडौं, ८ असार
शासन शक्ति गुमाएका पूर्वराजा ज्ञानेन्द्रको परिवारमा शान्ति पनि हराउँदै गएको छ । विगतमा छोरा पारसका कारण तनाबमा हुने पूर्वराजालाई अहिले ज्वाइँ राजबहादुर सिंहले दुःखी बनाएका छन् ।
कहिले राजनीतिक 'पार्टी'मा प्रवेश गर्ने त कहिले 'डान्स पार्टी'मा युवतीसँग बरालिने राजबहादुरसँग जेठान पारस पनि आक्रोशित छन् । स्रोतका अनुसार राजबहादुरले 'संघीय लोकतान्त्रिक गणतन्त्र मान्नेछु' भनेर नेपाली जनता दलमा प्रवेश गरेपछि
पूर्वराजपरिवार उनीसँग रिसाएको थियो ।ससुराली रिसाएपछि राजबहादुर आफ्नै पार्टीको कार्यालयमा एकपटकभन्दा बढी गएनन् । पार्टी केन्द्रीय समितिको बैठकमा आउन पटक-पटक आग्रह गरिए पनि उनी गएनन् । आफूहरूसँग सल्लाहसमेत नगरी ज्वाइँ जनता दलमा प्रवेश गरेको गुनासो त्यतिखेर पारसले सार्वजनिक रूपमै गरेका थिए । ससुरा र जेठानको चर्को आपत्तिपछि राजबहादुरले नेपाली जनता दल छाडिसकेका छन् ।
पूर्वअधिराजकुमारी प्रेरणा पनि राजबहादुरसँग दुःखी रहेको स्रोतको भनाइ छ । उनले आफ्ना बाबु, आमा र दाजुसँग श्रीमान् मदिरा खाने, युवतीहरूसँग बरालिने गरेको गुनासो गरेकी छन् । बाहिर युवतीहरूसँग नजिक भएर आफ्नी बहिनीलाई दुःख दिएको भनेर पारसले राजबहादुरलाई धेरैपटक धम्की पनि दिएका छन् । तर, राजबहादुरको व्यवहार नसुधि्रएको राजपरिवारनिकट स्रोतले जनाएको छ ।
दुई साताअघि दरबारमार्गस्थित फ्रेन्डसिप रेस्टुरेन्टमा केही युवतीसँग राजबहादुरले 'रमाइलो' गरिरहेको सुइँको पाएपछि पारस तत्कालै रेस्टुरेन्ट पुगेका थिए । तर, आक्रोशित पारस आउन लागेको सूचना पाएर राजबहादुर हिँडिसकेका थिए । त्यसैले त्यहाँ अन्यथा हुन पाएन ।
यसअघि पूर्वराजपरिवारको लगानी भएको रोयल क्यासिनोबाट राजबहादुरले एक कर्मचारी हटाएको भन्दै पारस आक्रोशित भएका थिए । पारसले क्यासिनोका प्रबन्ध-निर्देशक राजबहादुरलाई नभेटेपछि उनका सहयोगी कर्मचारीलाई कुटेर हिँडेका थिए । पारसको चेतावनीपछि कर्मचारी तत्कालै पुनर्बहाली भएका थिए ।
त्यसो त गत वर्ष दरबारमार्गमा मध्यरातमा हो-हल्ला गरेको भनेर काठमाडौं प्रहरीले राजबहादुरलाई पक्राउ गरी रातभर हनुमानढोका राखेको थियो । मदिरा खाएर युवतीहरूसँग हो-हल्ला गरेको भनेर उनलाई गिरफ्तार गरिएको थियो । बिहान त्यो पनि राजनीतिक दबाबमा उनलाई छाडिएको थियो ।
यस्ता घटनाले आफ्नो पनि बेइज्जत भयो भन्दै पूर्वराजपरिवार ज्वाइँसँग दुःखी छ । आफूसँग क्रुद्ध भएको थाहा पाएपछि राजबहादुर सकेसम्म जेठान र ससुराको नजिकै पर्न छाडेका छन् ।
राजबहादुर धेरैजसो विदेशमा र कहिलेकाहीँ मात्र नेपालमा बस्छन् । नेपालमै बस्दा पनि परिवारबाटै टाढा नै रमाउँछन् । दुःखी प्रेरणा सोल्टीमोडस्थित आफ्नै निवासमा बस्दै आएकी छन् । यो घर पूर्वराजा शाहले दाइजो दिएका थिए ।
त्यसो त, छोरा पारससँग पनि पूर्वराजाको सम्बन्ध अहिले मात्र सामान्य भएको हो । राजतन्त्र जानुमा दोष कस्को हो भन्ने विवादमा मुटाव भएपछि बाबु छोरा अलग-अलग बस्दै आएका थिए । लामो समय नागार्जुनमा बसेका पूर्वराजा अहिलेमात्र छोरासँगै निर्मलनिवासमा बस्न थालेका हुन् ।
तर, चितवनको टाइगर टप्समा 'फायरिङ' गरेर पारस विवादमा आएपछि पूर्वराजा चिढिएका थिए । तर, परिणामले कोल्टे फेरेर पारस मात्र दोषी होइनन् भन्ने स्थापित भएपछि बाबु ज्ञानेन्द्रले केही राहत महसुस गरेका थिए । तर पनि, मदिरा खाएपछि तनाब मच्याउने उनको बानी भने फेरिएको छैन ।
उता, यी सबै तनाबबाट टाढा रहेकी पूर्वमुमाबडामहारानी रत्न नारायणहिटीमा एक्लो जीवन बिताइरहेकी छन् । उनलाई भेट्न हरेक सोमबार पूर्वराजा ज्ञानेन्द्र नारायणहिटीमा पुग्ने गर्छन् । पारस भने वेलावेलामा नारायणहिटी जाने गरेको स्रोतको भनाइ छ ।
No comments:
Post a Comment