अनाथकी आमा

इटहरीको निःसहाय बालबालिका सेवा आश्रमकी गीता गौतम सधैँ व्यस्त हुन्छिन् । उनी अहिले ३३ जना बालबालिकाको आमा हुन् । उमेरले ६० काटेकी उनको मातृत्वमा हुर्किएका एक सय ५० जना निःसहाय बालबालिका अहिले देश-विदेशमा नयाँ जीवन बिताइरहेका छन् ।

सहाराविहीन बालबालिकाको संरक्षणमा ३० वर्षदेखि आमा बन्दै आएकी अविवाहित गीता आफैँ अनाथ हुन् । धनकुटाबाट भारतको बम्बईमा काम गर्न गएका उनका बाबुको पानीजहाजमा दुर्घटना भएको थियो । बाबुको मृत्युपछि आमाको डाँकाको आक्रमणबाट मृत्यु भयो ।

पाँच वर्षकी हुँदा अनाथ बनेकी गीता बम्बईकै जलान्धरस्थित गान्धी मनित आश्रममा हुर्किएकी हुन् । सो आश्रमबाट कलाकार बनेर इन्डोनेसिया र श्रीलंका जाने अवसर पाएकी उनी ०३६ सालमा नेपाल आएकी हुन् । विभिन्न जिल्ला घुमेर इटहरीमा उनले ०३९ सालमा डेढ कठ्ठा जग्गा खरिद गरेकी थिइन् । त्यही जग्गामा आफ्नो कमाइमा ०४० सालमा एउटा छाप्रो हालेर अनाथाश्रम स्थापना गरेकी हुन् ।

०४४ सालमा आश्रम दर्ता गरेर करिब डेढ सय बालबालिकालाई हुर्काइसकेको बताउँदै गीताले भनिन्, 'धैरैले राम्रो पढेर काठमाडांै र भारतमा जागिर खाइरहेका छन् । तीनवटी छोरीले स्टाफ नर्स पास गरेका छन् ।' उनले आश्रममा हुर्किएका अनाथहरूको बिहेसमेत गरिदिएकी छिन् । '१२ वटी छोरी ५ छोराको विवाह पनि गरिदिएँ ।'

अनाथ बालबालिकाको सेवाका लागि गीतालाई जिल्लावासीले पनि सघाएका छन् । 'जिल्लावासीले जेजस्तो सक्छन्, त्यहीअनुसार सहयोग दिइरहेका छन्,' उनले भनिन्, 'पहिलेको जस्तो आश्रम सञ्चालन र बच्चा पढाउन समस्या छैन ।'

आफैँ अनाथ गीताले राष्ट्र नै आमा भएको बताइन् । 'आकाशलाई छानो मान्ने हामीलाई यही प्यारो छ,' अनाथ बालबालिकाको सेवा गर्नु नै जीवनको आनन्द रहेको ठान्ने उनले सुनाइन्, 'सबैभन्दा ठूलो आनन्द बच्चाहरूको पेट भर्नु, पढाउनु र ओभानोमा सुताउन पाउनु हो ।' समाज सेवालाई धर्म मानेकी उनी धनी र गरिबबीचको विभेद चिर्नुपर्ने बताउँछिन् । महिला पनि पुरुषसमान भएको गीताको भनाइ छ । तर, कागज र भाषणमा मात्र महिला समान हुन् भनेर नपुग्ने उनले बताइन् । 'व्यवहारमै पुरुषसरह राज्यको हरेक अंगमा महिला सहभागिता हुनुपर्छ,' उनले भनिन् । तर, महिला र पुरुष समान रूपमा एक भएर अगाडि बढ्ने हो भने मुलुकको विकास सम्भव हुने उनको तर्क छ । 'एकता भएपछि मात्र बल हुन्छ,' उनले थपिन् ।