उमाविमा मोबाइल, मिनिस्कर्ट र मोटरसाइकल निषेध गरेपछि विद्यार्थीले मोबाइल र मोटरसाइकल आफन्तकोमा राखी शिक्षकका आँखा छल्न थाले

बुटवल, १२ असोज 

मोबाइल, मोटरसाइकल र मिनिस्कर्ट प्रयोगका कारण विद्यार्थीको पढाइमा बाधा पुगेको भन्दै बुटवलका उमावि सञ्चालकले कक्षा ११ र १२ का विद्यार्थीका लागि यी सेवा निधेष गर्ने भएको छ । सञ्चालकले यही शैक्षिक सत्रदेखि आप\mना सदस्य १७ उमाविमा मोबाइल, मोटरसाइकल र स्कर्ट निषेध गर्न प्रस्ताव गरेको छ । 

छात्रछात्रा क्लासमै मोबाइलमा गफिने, एकआपसमा एसएमएस आदानप्रदान गर्ने र अश्लील भिडियोसमेत पठाउने गरेको पाइएपछि कलेज सञ्चालकले मोबाइल प्रतिबन्ध गर्ने भएका हुन् । 'निकै हैरान भइयो, हात-हातमा मोबाइलले

कक्षा नै नियन्त्रणमा नहुने अवस्था हुन्छ,' एक शिक्षकले भने । यो समस्याले सबैतिरका कलेजलाई समस्याग्रस्त बनाएको छ ।

उच्च माध्यमिक विद्यालय संघ (हिसान) ले बुटवलमा उमाविमा अध्ययनरत विद्यार्थीमा देखिएका समस्या र समाधानका उपाय विषयक कार्यक्रममा सहभागी प्राचार्यले पढाइ नियमितताका साथै प्रभावित नहोस् भनेर निषेध गर्न खोजेको बताए । युवा विद्यार्थीमा फेसनझँै फैलिएको थ्री एम नियन्त्रण जरुरी भएको महसुस सबैतिर भएको छ । एकैचोटि कार्यान्वयन तहमा जाँदा समस्या हुने प्राचार्यहरूले आचारसंहिता बनाएर अगाडि बढ्नुपर्नेमा जोड दिए । 

कक्षा ११ र १२ मा अध्ययनरत विद्यार्थी मोबाइल र मोटरसाइकल प्रयोगमा बन्देज लगाइएपछि पनि नियन्त्रणमा कठिनाइ भएको हिसान रुपन्देहीका अध्यक्ष दामोदर भुसालले भने । मोबाइलबाट अश्लील भिडियो आदानप्रदान गर्ने क्रम बढेपछि यसअघि नै मोबाइल निषेध गरिएको थियो । 

 मिनिस्कर्ट कलेजमा अर्को समस्या बन्दै आएको छ । शरीरमा बढी फिटिङ भएका र एकदमै छोटा मिनिस्कर्टले विकृत बढेको भन्दै त्यसमा पनि कडाइ गर्ने निष्कर्षमा सञ्चालक पुगेका छन् । त्यस्तै पे्रमप्रस्तावका कारण हुने समूहगत लडाइँले पनि विकृति बढाएको भन्दै प्राचार्यहरूले अभिभावकहरू समयमै सचेत नभए यस किसिमका विकृतिले डरलाग्दो रूप लिने बताए । 

लागुऔषध सेवनमा विद्यार्थी फस्दै गएको तथा मदिरा, चुरोट र सुर्तीजन्य पदार्थको लतमा विद्यार्थी परेकाले नियन्त्रणका लागि सुरक्षाकर्मी तथा अभिभावकबीच समन्वय हुनुपर्ने खाँचो औँल्याए । 

मोटरसाइकल, मोबाइल र मिनिस्कर्ट पूर्णरूपमा विद्यालयपरिसरमा निषेध गर्ने, विभिन्न ठाउँमा ट्राफिक सुरक्षा जाँच बढाउने, मोटरसाइकल मोडिफिकेसन गर्न पूर्ण बन्देज लगाउने, विद्यालय हातावरिपरिका पसलेलाई मदिरा, चुरोट, सुर्तीलगायत वस्तु विद्यार्थीलाई बिक्री-वितरण गर्न पूर्णरूपमा रोक लगाउन पहल गर्नेलगायका आचारसंहितामा उल्लेख छन् । संघका अध्यक्ष भुसाल विद्यार्थी यौनजन्य कुरामा बढी संलग्न हुन थालेपछि पढाइमा कमजोर भएको बताउँछन् । करिअर बनाउनुपर्नेमा उनीहरू कुलततिर तानिएको उनको ठहर छ । रुपन्देहीमा संघमा ३१ वटा उमावि छन् । एसएलसीमा ५० प्रतिशतसम्म अंक ल्याएर उत्तीर्ण हुने विद्यार्थी ११ र १२ मा २५ देखि ३० प्रतिशतमा झरेका छन् । यसको मुख्य कारण थ्री एम भएको उनीहरूको ठहर छ । अभिभावकले छोराछोरीको समेत पढाइप्रति ध्यान नदिने गरेको उनीहरूले बताए । 

हिसानका केन्द्रीय सदस्य तथा तिलोत्तमा कलेजका प्रमुख डा. रामचन्द्र आचार्यले अभिभावक सचेत हुनुपर्ने हो, तर छोराछोरीलाई सुविधाका लागि अनावश्यक महँगा मोबाइल र बाइक किनिदिने प्रचलन बढेको छ । उनले भने, 'यसलाई निरुत्साहित गर्नुपर्छ ।' उच्च माध्यमिक शिक्षा परिषद्ले समेत आचारसंहिता नबनाएको अवस्थामा विद्यालय सञ्चालक आफै संहिता बनाउन जुट्नु सकारात्मक भएको जिल्ला शिक्षा अधिकारी चन्द्रकान्त भुसालले बताए । उनले भने, 'शैक्षिक परिणाम खस्किँदै गएको अवस्थामा यस्ता गतिविधिले राम्रो सन्देश दिनेछ ।'