शिवरात्रिमा डोरी टाँगी पैसा उठाउँदा बालिकाको मृत्यु

शिवरात्रिका अवसरमा सडकमा डोरी टाँगी सवारीसाधनबाट पैसा लिने क्रममा मिनीट्रकको ठक्करबाट एक बालिकको मृत्यु भएको छ ।
इचंगुनारायण-१ सिसापानीमा पैसा उठाउने क्रममा मिनीट्रकको ठक्करबाट रामकोटका भरत तामाङकी ८ वषर्ीया छोरी निशा तामाङको मृत्यु भएको हो । बा.२ख १४९८ नम्बरको मिनीट्रकले निशालाई बिहान १० बजेतिर ठक्कर दिएको थियो । उनको घटनास्थलमै मृत्यु भएको हो । ट्रकका चालक महोत्तरी घर भई स्वयम्भू बस्ने तेजबहादुर थापामगरलाई प्रहरीले पक्राउ गरेको छ ।
महानगरीय प्रहरी वृत्त बालाजुका अनुसार नजिककै ढुंगाखानीबाट माटो बोकेर दुईवटा ट्रक सँगै आएका थिए । अगाडिको ट्रकले बालबालिकालाई तर्साएर डोरी हटाउन लगाई अघि बढाएका थियो । पछाडिको ट्रक पनि अगाडिको ट्रकसँग अघि बढ्न खोज्ने क्रममा बालिकालाई ठक्कर दिएको हो ।
ट्रकमा बालिकको टाउको च्यापिएको थियो । ठक्करबाट मृत्युपछि स्थानीयले ट्रक तोडफोड गरेका छन् । अघिल्लो ट्रकका चालक दिलबहादुर थिङलाई कुटपिटसमेत गरेका छन् । थिङ दुवै ट्रकका मालिक हुन् ।
उता स्वयम्भूको जंगलमा एक व्यक्तिले झुन्डिएर आत्महत्या गरेका छन् । अन्दाजी ५५ वषर्ीय अम्मरबहादुर महतले रूखमा झुन्डिएर आइतबार दिउँसो आत्महत्या गरेका हुन् । प्रहरीले महतले लेखेको दुईवटा सुसाइड-नोटसमेत फेला पारेको छ ।