भारतले पानी थुनेपछि नेपाली भु-भाग डुवानमा

इनरुवा, माघ १५ - 

भारत बिहारको जल संसाधन मन्त्रालयको आदेसमा कोसी ब्यारेजका सबै ढोका शुक्रबारदेखि थुनिएपछि सुनसरीको ब्यारेज स्थित नेपाली भु-भाग डुवानमा परेको छ । ढोका बन्द गरिएपछि पानी बग्न नसक्दा कोसी ब्यारेजको सुनसरी क्षेत्रको पूर्वपट्टीको भाग डुवानमा परेको छ  सप्तकोसीको पुर्वी तटबन्ध अन्तरगत होचो रहेको स्थानमा तटबन्धमाथी पानीको दवाब बढेको छ । पानी नियमित रुपमा बग्न नसक्दा ब्यारेजको पूर्व उतर क्षेत्रमा लगाइएको सयौ बिगहाको गहुँबाली समेत डुवानमा परेको स्थानिय वासिन्दाहरुले जानकारी दिएका छन् । भारत सरकारले निर्माण गरिरहेको राष्ट्रिय राजमार्ग अन्तरगत बिहारको भवटियाहीमा

कोसी नदीमा निर्माण गरिरहेको पुल ढलानका लागि शुक्रबारदेखि ब्यारेजका सबै ५२ वटै ढोका थुनिएको हो । आइतबार सम्म ब्यारेजका ढोकाहरु नखोलिने कोसी ब्यारेज स्थित नियन्त्रण कक्षले जनाएको छ । नियन्त्रण कक्षका कर्मचारीहरुले आफुहरुले माथीको आदेशमा ढोका बन्द गरेको बताएका छन् ।  कोसी ब्यारेजका किसानहरुले भने आफुहरुले लगानी गरि खेतमा लगाइएको गहुवाली कोसी योजनाको लापरवाहीले डुबेको आरोप लगाएका छन् ।