रोहित पराजुली
कास्की, १२ माघ
नौमती बाजाको झ्याइँझ्याइँले मन्दिरपरिसर गुञ्जायमान थियो, जन्ती पनि बाजाको तालमा छम्छम् नाच्दै थिए । ढाकाको दौरा, सुरुवाल र टोपीमा सजिएका बेलायती बेहुला त त्यसै-त्यसै मख्ख थिए ।
६०औँ पटक नेपाल आएका बेलायती नागरिक ग्यारी भानौको यो भ्रमण विशेष थियो । नेपाली केटी बिहे गर्ने योजना सफल भएकोमा उनी दंग थिए, कम्मरमा खुकुरी भिरेका विदेशी बेहुला देखेर बटुवा पनि छक्क थिए ।
ग्यारीका जन्ती बुधबार बिहान पोखरा लेकसाइटस्थित नेपाल गेस्टहाउसबाट हिँडेका थिए, केहीबेरमा जन्ती बैदामस्थित केदारेश्वर मन्दिर पुग्यो जहाँ नेपाली चेली साधना श्रेष्ठ प्रतीक्षामा थिइन् ।
५५ वर्षीय ग्यारी र ४३ वर्षीया साधनाले मंगलबार नै जिल्ला प्रशासन कार्यालयमा कानुनी बिहे गरेका हुन् । तर, ग्यारीले नेपाली संस्कृतिअनुसार पनि बिहे गर्ने इच्छा गरेपछि बुधबारको कार्यक्रम तय भएको हो । 'मैले नेपाललाई माया गरेको आज सार्थक भयो,' बुधबार बिहेपछि उनले भने ।
उनको बिहेमा बेहुली पक्षका युवतीले बेहुलाका जुत्ता लुकाउने चलन पनि देखियो । बेहुला जग्गेमा जाँदाजाँदै युवतीहरूले जुत्ता लुकाइदिएका थिए । तर, पछि खाना खाने वेलामा खुट्टा खाली भएपछि उनी भन्दै थिए, 'अहिले जुत्ता देऊ, खाना खाएर आउँछु र फेरि लुकाउला ।' उनको यो प्रस्ताव सुनेर सबै हाँसे, तर जुत्ता दिएनन् । 'बार्गेनिङ'पछि बेहुलाले तीन हजार रुपैयाँ दिए र जुत्ता फिर्ता लगे ।
बेलायती संस्कृति र समाज मन नपर्ने बताउने भानौ सन् १९८० मा पहिलोपटक नेपाल आएका हुन् । अहिलेसम्म ६० पटक नेपाल आएको उनले बताए ।
उनी आफ्नो देश बेलायतलाई छुट्टी मनाउने ठाउँ र नेपाललाई आफ्नो घर भन्छन् । 'मलाई नेपाल धेरै मनपर्छ, त्यसमा पनि पोखरा सबैभन्दा धेरै,' उनले भने । आफ्नो देशका केटी यौन र पैसालाई मात्र प्राथमिकता दिने हँुदा आफूले उता बिहे नगरेको ग्यारीको भनाइ छ । 'यताबाट धेरै मान्छे पैसा कमाउन उता जान्छन्, तर म यतै जीवन बिताउन चाहन्छु,' उनले भने ।
दुलहीका बहिनीज्वाइँ काठमाडांैनिवासी हीरा श्रेष्ठ र पर्वत घर भई हाल काठमाडौं बस्ने नारायण अधिकारी यो बिहेका लमी थिए । अधिकारीका छोरासँग इन्टरनेटमा च्याट गर्दा भानौले नेपालमा बस्ने र विवाह गर्ने इच्छा व्यक्त गरेका थिए । 'छोराले भनेपछि मेरा साथी हीरा श्रेष्ठसँग कुरा गरेँ, साधनासँग ग्यारीको कुरा मिल्यो,' अधिकारीले भने ।
उनका अनुसार पोखरा- १ बागबजारकी साधना र ग्यारीको बिहे तीन वर्षअघि नै पक्का भएको हो । बेहुला 'ट्रेन मेनेजेर' हुन् भने बेहुली सामाजिक कार्यकर्ता ।
दुलहीका बाबु रामभक्त श्रेष्ठले केटाकेटीको कुरा मिलेपछि बिहे गरिदिएको बताए । 'दुवैको कुरा मिल्यो, आज बिहे पनि भयो, नेपाललाई माया गर्ने विदेशी ज्वाइँ भेटियो, मलाई योभन्दा खुसी के चाहियो र ?' उनले भने ।
भानौले यसअघि बेलायती दूतावासबाट विवाहका लागि नो अब्जेक्सन लेटर पनि ल्याएका छन् । त्यस्तै बिहेका लागि २१ दिन नेपाल बस्नुपर्ने कानुनी प्रक्रिया पनि पूरा गरेका हुन् ।
No comments:
Post a Comment