दैलेख राकम कर्णालीका कल बिष्टले भारतबाट एड्स बोकेर फर्के । उनले पत्नी मनसरा सिंजापतिलाई पनि एड्स सल्काए । एड्सपीडित बिष्टले छोराको हत्या गरे । र , आफूले आत्महत्या गरे । यसै सम्बन्धमा तयार पारिएको विशेष रिपोर्ट ।
“मलाई त एड्स सल्काए , सल्काए, छोरालाई समेत मारेर आफूले समेत आत्महत्या गरे हजुर मेरा श्रीमान्ले !” दैलेखको राकम कर्णालीकी मनसरा सिंजापतिले रुदै भनिन् ।
“एकाबिहानैदेखि छोरालाई आंखै अगाडि निकै पिटेको देखेकी थिएं, म मेलामा गएं, सांझ आउंदा त छोरालाई मारिसकेका रहेछन् । छोराको लाशमात्र थियो घरमा ।” मनसराका आंखा अझै ओबाएका छैनन् । छोराको लाश सम्झेर अहिले पनि भक्कानिएर रुन्छिन् उनी ।
आंखाबाट आंशुका भेल बगाउंदै उनले बेलिबिस्तार लगाइन् –“छोरालाई त मारे , मारे । आफूले पनि आत्महत्या गरे ।”
हो, भारतमा कमाई गर्न भनेर गएका मनसराका पति कल बिष्टले घर फर्कदा एड्स बोकेर फर्किए । अनि छोरा मनसरालाई पनि एड्स सल्काए । अन्तमा छोरालाई मारेर आफूले आत्महत्या गरे । मनसरा भन्छिन् –“ सुन्दर संसार होला, घरपरिवारमा रमाइलो गरी जिन्दगी काटौंला भनेको त अहिले रोएर दिन काट्नुपरेको छ ।”
श्रीमान्को मृत्युपछि शाशुले घरबाट लखेटेपछि अहिले मनसरा एचआईभी संक्रमित एकल महिला माइतीमा बसेकी छिन् । उनी भन्छिन् –“दुख सुनिदिने भगवानले त साथ दिएनन् भने अरु कस्ले साथ दिन्छ र ?”
मनसरामा एचआईभी संक्रमण भएको थाहा पाएपछि उनले खाएको थाल समेत अरुले छुन मान्दैनन् । उनले औषधी खाइरहेकी छिन् । तर मेलापात जांदा समेत साथीसंगीले रोग सर्छ जस्तो गर्दै पोई र छोरो टोकुवा भन्दै गाली गर्ने गरेको दुखेसो छ मनसराको ।
मन झसंग हुने यस्तो पीडा मनसराको मात्र होइन । दैलेखको राकम कर्णालीमा एड्सका रोगका कारण धेरैले ज्यान गुमाएका छन त कसैले बुढेस कालको सहारा गुमाएका छन् । भारतको मुम्बई जाने पुरुषहरु फर्कदा एड्स बोकेर फर्कन्छन् । राकम कर्णालीमा एड्सको नाम समेत बदलेर गाउँको भाषामा बम्बैको रोग भनिन्छ ।
पैसा कमायो बम्बैमा, मोजसस्ती गर्यो , फर्कदा एड्स बोकेर फर्कन्छन् ।
राकमकर्णालीको जाक्सी गाउमा एकै वस्तीका ९ जना पुरुष एड्स रोगबाट मरिसकेका छन् । भगवानले श्राप दिएको भन्दै महिलाहरु कलिलो उमेरमा श्रीमान गुमाएर विधवा बनेर बस्न बाध्य छन् ।
राकम कर्णालीमा एड्सबाट मर्नेहरुका घर घरमा दैलामा फोटो राखेर माला चढाएको हेर्न पाइन्छ ।
मनसरा मात्र होइन, सिगासैन ९ की खगीसराले समेत भारतमै एचआईची संक्रमित भई नेपाल पठाईएका आफ्ना पती नेपालगंज उपचार गर्दा गर्दै मृत्यु भएपछि मात्रै आफुलाई एचआईभी संक्रमण भएको थाहा पाइन् ।
पहिला पहिला गाउँमा निकै हेला गरेको उनको अनुभव छ ।
स्थानिय संस्था लघुउद्यमले दिएको सानो व्यापार गरेर १ छोरा र १ छोरी पालेर उनले आफ्नो जीवन काटिरहेकी छिन् । सिंहासैन( ९ की एचआइभी संक्रमित दुरी बिकको कथा पनि उस्तै छ । चिसो समय डाँडाको एक छेउमा एकान्त घर अनी आफुसँग रहेका दुई छोरा र बिरामी भएर ओछ्यानमा मृत्युसँग लडिरहेकी सासुलाई
पाल्ने जिम्मा लिएकी दुरी बिकलाई अहिले भोकै मरिने चिन्ताले सताएको छ ।
भारत कमाउन गएका उनका श्रीमान रामबहादुर बिकले गरेको कमाईले घर खर्च चलाएका उनका परिवारमा बिगत पाँच बर्ष अघि रामबहादुर बिकको एचआईभि एड्सका कारण मृत्यु भएपछि निकै ठूलो समस्या आएको छ ।
“श्रीमान सँधै भारत जानुहुन्थ्यो उहाँकै कमाईको भर थियो, घर परिवार पाल्ने” दुरी बिकले रुँदै भनिन् । भारतमा गएको बेला गरेको असुरक्षित यौन सम्र्पकका कारण एड्स लागेछ । अलिअलि कमाएर ल्याएको रकम उपचारमा सकियो केहि गरे सन्चो भएन, अन्त्यमा मृत्यु भयो । दुरी भन्छिन् – आफुले रोग सार्नुभो ,आफु मर्नुभो , मलाई यो संसारमा पिडा भोग्नुपर्ने भो ।
आर्थिक अभावका कारण आफ्नो स्वास्थ्य अवस्थाको बारेमा जानकारी गराउन सदरमुकाम दैलेख बजारसम्म आउन नसकेका कैयन पीडितहरु त घरमै ज्यान गुमाउने गरेका छन् । पीडितहरुका लागि जिल्ला सदरमुकामबाटै एआरभी सेवा संचालनमा आएको भएपनि त्यसले प्रभावकारीता पाउन सकेको छैन् ।
दैलेखको पश्चिम पर्ने सिहासैन, राकम कर्णाली र अछामका दुई दर्जन बढि महिलाहरुले आफ्ना श्रीमानहरु एचआईभी एड्सका कारण गुमाईसकेपछि आफुहरुलाई समाजमा गरेको अपहेलनाका बिरुद्धमा लड्ने र चेतना फैलाउने उद्धेश्यले समुहमा आवद्ध भई काम गरिरहेको स्थानिय सामाजिक संस्थाका हिरासिंह थापाले जानकारी दिएका छन् ।
अहिले राकम कर्णाली, अछाम र सिहासैनका पिडित महिलाहरुले राकम कर्णाली एचआईभी प्लस समुहको स्थापना गरि १८ जना महिलाहरु आवद्ध भई आवाज उठाउन तयार भएका छन् । तर बिडम्वना जिल्लामा एचआईभी एड्स रोकथामका लागी आएका सानोतिनो बजेट पीडितहरुको हातमा पर्न सकेको छैन । नत पीडितले औषधी उपचार नै पाएका छन् ।
No comments:
Post a Comment