समोसाभित्र ब्राउनसुगर

फागुन भैरहवा जिल्ला प्रहरी कार्यालय रूपन्देहीको हिरासतमा रहेका थुनुवालाई भेट्न गएका व्यक्ति एक ग्राम ब्राउनसुगरसहित पक्राउ परेका छन् । उनले साथीलाई लगिदिएको आलु समोसाभित्र सो ब्राउनसुगर फेला परेको थियो ।

सिद्धार्थनगर नगरपालिका-१३ निवासी २३ वषर्ीय वासुदेव गुरुङ आइतबार थुनुवालाई भेट्न जाँदा पक्राउ परेका हुन् । उनले प्रहरीले थाहा नपाउने गरी आलुको समोसाभित्र ब्राउनसुगर राखेर जिल्ला प्रहरी कार्यालयको हिरासत पुगेका थिए । साथीलाई लगेको समोसा प्रहरीले गुरुङलाई चाख्न भनेपछि उनी पक्राउ परेका हुन् ।

जिल्ला प्रहरी कार्यालय रूपन्देहीका प्रहरी उपरीक्षक शेरबहादुर बस्नेतले गत असोज २७ गते लागुऔषध कारोबार गरिरहेको अवस्थामा पक्राउ परेका गुरुङ गत माघ २५ गते दुई हजार धरौटीमा रिहा भएको जानकारी दिए । रिहा भएको एक साता बित्न नपाउँदै गुरुङले हिरासतमा रहेका साथीलाई भेट गर्ने बहानामा ब्राउन सुगर ल्याएर दिन खोजेको उनले बताए ।

पक्राउ परेका गुरुङले ८८ दिन हिरासतमा बस्दा लागुऔषध सेवन गर्ने साथीसँग परिचय भएको र उनीहरूले भनेबमोजिम एक ग्राम ब्राउन सुगर ल्याइदिएको बताएका छन् । सो ब्राउन सुगर सीमावर्ती भारतको सुनौली बजारमा तीन सय रुपैयाँमा खरिद गरेको समेत उनले बताए ।