आशा

अल्झेको जीवन , पछि हेरेँ माकुरा म नै हुँ ।
सफलता चुम्ने, सपना ती अपुरा म नै हुँ ।।

उकाली ओराली, सुस्ताउँदै आराम त गरेँ ।
यात्रा अप्ठेरो, बाटो छेक्ने टाकुरा म नै हुँ ।।

दौड रे जीवन, साथी सँगी सबै बढे अघी ।
सगैँ रमाएको, कहानी ती अधुरा म नै हुँ ।।

विगतका सबै पलहरू, सम्झना मिठो छ ।
आश ब्युँताउने, तस्विर ती मधुरा म नै हुँ ।।

निरस जीवन, मरभूमी झै भए, के भो र?
शीत विनापनी, पलाउने आकुँरा म नै हुँ ।।


भुलाउनु छ


सपना तिम्रो देख्दै तिमीलाई भुलाउनु छ
आखिर कुनै बहानामा निदरी त्यो बोलाउनु छ

बोतल लिँदा दोधार हुन्छ पिउँ कि नपिउँ भनि
नशा माथी अर्को नशा फेरी किन मिसाउनु छ

भरिएथ्यो तिम्रो माया अब याद नि थपियो
एउटा सानो मुटु मेरो कति ठूलो देखाउनु छ

नगर भो प्रस्ताव अब नायक बन्न त्यो कथामा
छोड यार ! मलाई किन जमाना हसाउनु छ

ठेक्का नलि 'एकतारे' संसारको दुःख साट्ने
यौटा छाडी बाँकीलाई त पक्कै रूवाउनु छ